孔雀開屏記（上）
孔雀開屏，係為咗求偶。
但用得個「求」字，就會有「求不得」；用得個「溝」字，就會有「溝唔到」。
作為一隻雄性孔雀，我嘅尾羽生得唔靚，我都知道，自己求偶冇咁易成功。
但係真係被心儀嘅雌孔雀拒絕嗰陣，我依然好傷心。
我同好兄弟阿龍傾計：「你話，點先可以令小雯鍾意我？」
「哎，小雯拒絕你，你咪搵下一個囉，全世界咁多雌孔雀，何必咁執著呢？」阿龍好隨意咁答。
我又羨慕又嫉妒咁望向阿龍美麗嘅尾羽：「你咁靚仔，你追邊個都冇問題啦。」
「係，我靚仔，我追我女朋友嗰陣好順利。」
阿龍話鋒一轉：「但靚仔從來都係少數，唔通個個女仔都可以嫁靚仔咩？你只要轉吓目標，遲早會搵到老婆。」
我長嘆一口氣：「但我真係好鍾意小雯，我唔想追其他女仔。」
「你都向小雯開過屏啦，佢就拒絕咗，你仲可以點？」阿龍問。
阿龍講得啱，孔雀嘅世界好簡單，雄性開屏，雌性決定接唔接受，唔似人類擇偶咁，除咗外表，仲要講錢講性格講人生觀……
換句話講，我對住小雯開過屏，佢唔滿意我嘅尾羽，我哋嘅故事就應該完結咗，我亦冇努力嘅空間。
但我唔甘心，我好鍾意小雯，我想繼續追求佢。
我嘅目光落喺阿龍嘅尾羽上：「好兄弟，幫幫手。」
「其實尾羽冇咩實際功能，又唔打得又唔食得。」
我估計：「只係女仔睇到靚嘅尾羽，畫面靚，心情好，就自然容易答應求偶。」
阿龍一頭霧水：「所以呢？」
我提出：「所以下次我向小雯開屏，你可唔可以喺隔離開屏，營造一個美麗嘅畫面？」
阿龍呆咗：「萬一小雯睇中我，雖然我唔會接受佢，但係……你都唔想咁㗎嘛。」
阿龍講得有道理，如果我同阿龍一齊喺小雯面前開屏，小雯係會心情好，但都好有可能會睇中阿龍。
但如果有好多隻孔雀，一齊開屏呢？
就算其他孔雀冇阿龍咁靚仔，但十幾條尾羽喺小雯面前盛放，一定令小雯目不暇給，心花怒放。
而且，咁多隻孔雀企埋一齊，只要企位上安排得好，小雯未必留意到阿龍。
我即刻行動，搵咗十幾個兄弟，練好排位，約定時間，出現喺小雯面前。
「小雯，你係我心目中最優秀嘅孔雀。我曾經為你開屏，但我單薄嘅尾羽，唔足以襯托你嘅完美。」
我用鄭子誠式嘅聲線講：「所以今日，我要將所有嘅美麗，奉獻畀你。」
然後，所有孔雀一齊開屏，好似繁花盛放一樣，美不勝收。
呢個時候，我從眾多孔雀中行出嚟，猶如眾星拱月：「你願唔願意同我一齊，共享呢個世界嘅喜與悲？」
「噢，天啊！」小雯流下感動嘅眼淚，投入我嘅懷抱。
路過嘅女仔紛紛驚嘆：「太浪漫啦，呢啲先係愛情。」
「我老公當日向我開屏，只係問我『願唔願意交配』咋。」
梗係啦，我唔止搵咗班兄弟嚟排練，仲寫好講稿，再三推敲，先有一場咁動人嘅表白。
下集：https://bit.ly/3giAy4x
將專頁設定為「搶先看」/ "See first"，最新故仔馬上睇！
我睇住個學生爆炸：https://goo.gl/hpDtp6
真實惡魔：http://bit.do/e4jnX
#短故 #短篇 #小說 #陳美濤 #廣東話 #粵語 #tomatochan #孔雀開屏記
Search